ARISTANIS. Assoltos pro no àere commìtidu su fatu: su tribunale de Aristanis at giudicadu sena curpa sos cumponentes de su Colletivu Furia Rossa Marco Contu, Davide Pinna e Mario Figus, parados a processu pro difamatzione a su ex cuestore de Aristanis Francesco Di Ruberto e a duos funtzionàrios de sa Digos pro unu artìculu publicadu in su blog de su movimentu.

Acusadu fiat unu post chi chistionaiat de acuntèssidas de su 2015, cando sa famìlia Spanu de Arborea l’aiant bogada dae s’azienda posta a s’asta a pustis meses de opositzione a sa gaddiada. Pro agiudare sa faina de s’ufitziale giuditziàriu fiant intervènnidas sas fortzas de s’ordine in truma. E cun sa presèntzia issoro e sa faina de fortza aiant agurpadu sas persones de su Colletivu.

A pustis de sa cuerela su pm aiat pedidu s’archiviatzione duas bortas, ma sas persones ofèndidas aiant curiadu e pedidu una ammendadura manna. Su processu fiat comintzadu su 3 de su mese de santandria coladu. Oe sas sentèntzia, chi assolvet cun fòrmula prena sos tres imputados, assistidos dae sos avocados de s’assòtziu Libertade. Ammaniadu finas su dissecuestru de su blog.