CASTEDDU. Tirocìnios suspesos. Ma cale est su benidore de chie bi campaiat? Non torrant che relata de traballu e sas Regiones sunt intervènnidas pro los firmare respetende sos paritzos Dpcm.

“Tocat a si mòere deretu pro tutelare sos tirocinantes, categoria de importu pro sa culletividade nostra e resursa de giudu pro su benidore de s’economia nostra e de sa regione nostra”, declarat Maria Laura Orrù, consigera regionale de sos Progressisti, “Non ismentighemus chi sos tirocinantes sunt una parte manna de sa populatzione e sunt de importu pro su funtzionamentu de sas aziendas pùblicas e privadas”.

“Semus cumbintos chi nemos depat abarrare a coa e chi sas categorias prus dèbiles e prus pagu tuteladas meressant d’atentu mannu dae banda de sas istitutziones”, annanghet sa cullega Laura Caddeo.

“Pedimus a su presidente Solinas, cando est chi chèrgiat a fàghere incomintzare torra sos tirocìnios suspesos, respetende sas mesuras organizativas de preventzione e amparu individuale. Est de importu mannu a sustènnere sos tirocinantes in custu mamentu de dificultade manna, non nos podimus permìtere de nche lassare sa fortza de traballu de su benidore”, serrat Orrù.