CASTEDDU. In sa purrata de emergèntzia sanitària acapiada a s’isparghinada de su Covid-19 si podent fàghere fainas de regorta de s’addescu, de tusòrgiu de sas berbeghes e de sa tirada de su fortigu. Lu narat s’assessora regionale de s’Agricultura, Gabriella Murgia, a pustis de sos Dcpm aprovados intre de su 22 de martzu e su 10 de abrile colados.

S’atividade de pastinòngiu de s’addescu (còdighe Ateco n. 01.19.90) chi b’at finas sa fase de regorta e de chistida de custu, resurtat posta intre de sas atividades chi si podent fàghere dae su Dcpm de su 22 de martzu 2020. Bi sunt puru “sas àteras atividades de agiudu a sos animales” (còdighe Ateco 01.62.09) ue est prevìdidu finas su tusòrgiu de sas berbeghes.

Sa leada de su fortigu l’ant cunsentida dae pagu cun su Dcpm de su 10 de abrile 2020 chi at illarghiadu s’allistada de sas fainas cunsentidas in silvicoltura e àteras atividades forestales (còighe Ateco 02.10.00),  intre de custas a seguru b’at  cussa de su suèrgiu. S’at a dèpere fàghere sempe e cando respetende sa lege 4 de su 9 de freàrgiu 1994 e prus a notu s’artìculu 27, commas 1,2 e 3,  chi ponet in cabu de su Corpus Forestale e de Vigilàntzia ambientale de sa Regione sa cumpetèntzia autorizativa in matèria. Sa purrata de leada est posta, che ordinària, dae su primu de maju a su 30 de cabudanni e podet èssere mudada cun decretu de s’assessore regionale de sa Defensa de s’ambiente. Su dcpm de su 10 de abrile at postu intre de sas fainas cunsentidas finas su fraigu de produtos pro su traballu de su fortigu (còighe Ateco 16.29.19),assegurende gasi s’operatividade prena de totu sa filera.