CASTEDDU. “Si non si faghet calicuna cosa luego, sas domos de reposu arriscant de devènnere in Sardigna una bomba sanitària mera e sìnchera”. Alberto Farina, segretàriu generale de sa Federatzione Pensionados Cisl-Sardiga, ponet s’atentu subra su chi est acuntessende a sos betzos òspites in comunidade de assistèntzia, ue in sas ùrtimas dies sunt essidos a campu paritzos contàgios. “Sas stituatziones particulares de emergèntzia de sos ospidales oe non permitint a medas betzos –narat Farina – su ricòveru luego in repartos atretzados pro cuntrastare cun atzivesa s’atzione de su coronavirus, pro su prus dannosa pro persones mannas de edade e finas cun una o prus patologias”. “Dae cando est mòida custa emergèntzia est istadu giustu chi sas domos de reposu las apant isuladas, intregadas feti a s’impinnu e a sa generosidade de su personale chi depiat fàghere s’assistèntzia. Sos betzos sunt assustados – annanghet su segretàriu generale FNP – ca s’abbìgiant de sa cosa ma podent petzi castiare sena pòdere fàghere nudda contra sa morte chi est arribende, a tesu dae sos parentes e dae sos afetos prus caros chi non podent andare a los bisitare pro chistione de seguresa”. Sa Regione – serrat Farina – Depet intervènnere cun totu sas fortzas suas e cun totu sos trastes pro sarvare sos betzos nostros e agiudare s’atzione de sos operadores chi los cuntivìgiant, trunchende custa cadena dolorosa semper prus drammàtica.
