ROMA. “Totu serradu finas a su 3 de maju”. Gosi su premier conte at annuntziadu in cunferèntzia de imprenta sa pròroga de sas mesuras astrintòrgias pro totu s’Itàlia cun unu Dcpm nou. Pròroga chi, at marcadu Conte, balet finas pro sas atividades produtivas. “Non podimus fuliare su chi amus fatu finas a como: su diamus rùere como podimus pèrdere totu sos resutos balangiados, cun una ismanniada de sos mortos. Depimus sighire a mantènnere artu s’atentu”. “Su disìgiu est chi a pustis de su 3 de maju si potzat torrare a partire cun giudìtziu abellu abellu: depimus fàghere un’àteru isfortzu e abarrare atesu s’unu cun s’àteru”, at naradu su premier. Non semus galu a tretu de torrare a pertire de su totu: podimus impromitere peroe – at marcadu – chi si finas in antis de su 3 de maju sas cosas diant mudare amus a chircare de nos adatare e fàghere cunforma a su chi est acuntessende”.

“Su Comitadu tècnicu iscientìficu – at marcadu Conte – nos at cunfirmadu chi sos datos dant ispera: sas mesuras sunt funtzionende, Istùdios professionales, fàbricas, librerias e negòtzios de bestimenta pro pipios ant a abèrrere: medas de sas atividades produtivas ant a pòdere torrare a abèrrere martis 14 de abrile, est a nàrrere chi no lis at a pertocare su decretu nou de su Presidente de su Consìgiu chi at a illarghiare unas cantas serradas finas a comintzu de maju.

Ae su 14 de abrile ant a torrare a abèrrere (cun sas precautziones chi li tocat) librerias, cartolibrerias, negòtzios pro pipios e carchi atividade produtiva (sa silvicoltura e forestales). “Pro sa fase 2 – at acraridu Conte – su traballu est giai comintzadu: non podimus isbetare chi su virus si nch’andet de su totu pro fàghere torrare a partire su territòriu nostru”.