CASTEDDU. “ A s’accabu de su lockdown sa Sardigna aiat propostu unu modellu de preventzione de su contàgiu chi aeret limitadu meda sa possibilidade de s’isparghinada de su virus in Sardigna, cunsentende de fàghere una istajone turìstica serena e istrinende a sa regione nostra s’oportunidade de si propònnere comente terra ideale pro sas vacàntzias. Unu modellu chi no ant lassadu fàghere a sa Sardigna, ma chi in sos meses a pustis s’est cunfirmadu utilosu e adatu”. Su presidente de sa Regione Christian Solinas, in sa serrada de sa sessione dedicada a sa Sardigna dae sos Innovation Days ammaniados dae “Il Sole 24 Ore”, at torradu a marcare s’atentzione subra sos chi mutint “passaposrtos sanitàrios”.

Essende un’ìsula, at ammentadu Solinas, “aeremus tentu sa possibilidade de disfrutare unu istrumentu atzivu pro limitare sa circulatzione virale, no a seguru de sos diritos de sos citadinos, ma antzis una garantzia pro totus, sardos e turistas”. E at annantu: “In medas oe nos torrant sa resone; comomai peroe non depimus pensare a su coladu ma prus che àteru a comente cuntrastare custa segunda aundada e sa pandemia econòmica chi nde diat sighire”. Semper subra su tema de turismu at naradu “Cherimusavalorare cussos aspetos de identidade e unicidade chi sa Sardigna costoit, a tretu de destajonalizare avalorende su patrimòniu mannu nostru e cussu etnogràficu e archeològicu”.

Pro su chi pertocat s’indùstria, si est beru chi s’istajone de sos investimentos mannos agevolados, de s’indùstria manna cun impatu ambientale forte est barigada, est semper beru, at sighidu Solinas, chi no esistit economia in su mundu chi non tèngiat finas in su Pil suo s’indùstria traditzionale. “La depimus duncas pònnere in contu in su benidore nostru” at annantu su presidente. In custu setore unu sustennu forte at a oòdere bènnere dae su recovery Plan, chi at a intervènnere in sas leadas de sas indùstrias mannas cun 75 miliards chi ant a èssere indiritzados cara a interventos green. In primu pianu, in s’interventu suo, finas su progetu chi pertocat “sas minieras firmas de su Sulcis pro sa produtzione de gas Argon, in unu impiantu chi at a èssere segugundu petzi a cussu in sos Istados Unidos in Colorado. Finas ortu Turre b’at a èssere sa rivolutzione green, colende dae s’indùstria pesante a cussa fine, iniritzada a s’indùstria farmaceutica e a sa trasformatzione de sas prantas oficinales”.