PÁDOVA. Sa Sardigna? Podet essire dae su blocu in antis de sas àteras regiones. “Dia abèrrere in antis sas leadas ue s’arriscu de trasmissione de su virus est prus bassu, che a sa Sardigna, provìntzias comente a Casteddu, Aristanis. E dia lassare a ùrtima a sa Lombardia, Bèrgamo mescamente”. Sa tesi subra unu isbetu de islascare sas astrintas, chi benit male semper e cando at a acuntèssere, est de su viròlogu Andrea Crisanti. No est chi siat s’ùrtimu arribadu: est su diretore de su Dipartimentu de meighina molecolare de s’Universidade de Pàdova, chi at analizadu a fundu sos datos de s’epidemia cun una barantena intre de chircadores e tècnicos partzidos in duos grupos de traballu, unu italianu de s’azienda ospidaliera e de s’ateneu suo e unu britànnicu, coordinadu dae su Neil Ferguson  de su Imperial College de Londra, su matemàticu chi at mudadu su parre de Boris Johnson incarrerendelu a una trassa prus forte. Sos faeddos de Crisanti los at istrinados su Corriere delle Sera.

Su professore at annuntziadu una publicatzione chi at a essire luego de sos resurtos subra unu istùdiu mòidu dae s’iscumpru subra Vo’ Euganeo, epicentru de su contàgiu in su de àdova. In curtzu: si b’at unu positivu in famìlia s’arriscu de cuntàgiu est de 84 bortas prus artu. Duncas, narat Crisanti, “como diat èssere mègius a impitare sa mascheredda e sos guantes finas in domo. E, mescamente, a istransire s’impitu de ambientes cumpartzidos. Mi nde sapo de su sacrifìtziu ma sos resurtos de s’istùdiu nostru subra sas probabilidades de s’infetare mustrant a craru sa faina bona de s’astrinta in sos cumportamentos”, narat a su Corriere.

Analizende s’andanta de s’epidemia su docente narat a parre suo chi “sos indicadores nos narant chi in fines calicuna cosa de bonu est acuntessende, mancari chi sos mortos siant galu medas. Deo tèngio ispera”. Tempos? Como bi sunt chidas de blocu, ma deretu a pustis “diat tocare a torrare a una gradualidade territoriale. Dia apèrrere in antis sas leadas ue s’arriscu de trasmissione de su virus est prus bassu, che a sa Sardigna, provìntzias comente a Casteddu, Aristanis. E Dia lassare a ùrtimu a sa Lombardia, mescamente Bèrgamo. Ma tocat a fàghere a lestru. Proite chèrgio nàrrere chi su male peus in sa luta a su coronavirus est istada issa: sa burocratzia. Si podiat fàghere meda e deretu”.