CASTEDDU. “Pro sa Sardigna, tretos marinos amparados e parcos sunt una parte de importu de sa sienda ambientale manna chi sa Regione bolet amparare e defensare e chi podet èssere, in prus chi unu bene de primore pro sa calidade de sa vida de sos Sardos, unu puntu firmu de s’istantargiada sòtziu-econòmica de s’ìsula”. L’at naradu s’assessore regionale a sa Defensa de s’Ambiente, Gianni Lampis, arresonende de s’istantziamentu de unu millione de èuros, pro su 2020, intregadu a s’acumprida de interventos istruturales de amparu e avaloramentu ambientale de sos tretos de interessu naturalìsticu dislindadu.

Una parte de custu dinare (310.382 èuros) fiat giai programmada in abrile coladu pro permìtere sa cobertura finantziària de sas propostas chi arribant dae s’atuatzione de su “Prioritized action framework" (Paf) e de sos Pianos de gestione de sa “Rete Natura 2000”. Mentras, su chi sobrat (689.618 èuros) est intregada a s’acumprida de duas òperas istruturales de amparu e avaloramentu ambientale, giai finantziadas dae sa Regione, e a unu interventu de irraighinada de ispècies angenas (animales o prantas foras de su habitat naturale issoro, chi sunt una amenetza a sa biodiversidade e a sa salude umana, in prus de cajonare dannos econòmicos).

Pro s’acumprida de su programma de avaloramentu e gosamentu de sas ìsulas de Is Càvurus e Serpentara, propònnidu dae s’Area marina amparada Cabu Crabonaxa e dae su Comune de Crabonaxa, bi sunt istantziados 300 mìgia èuros, ateretantos pro s’acumprida de su centru didàticu pro dischentes e impitadores de s’Area marina amparada e ecoforesteria de su mare, propònnidu dae s’Amp Tavolara – Cabu Coda Cavallo. Pro sos interventos de irraighinada de sa trachemys scripta e de àteras ispècies vegetales angenas, propònnida dae su parcu regionale de Molentàrgius – Salinas, bi sunt 89 mìgia èuros.