CASTEDDU. Sa firmada a sos cullegamentos navales, dae e cara a sa Sardigna fatos dae Tirrènia, a pustis de sa firmada de sos contos pedida e retzida dae sos licuidadores de Cin (INOGHE SA NOVA) est una istrempada manna pro s’ìsula: si cussu de su trasportu passegeros est unu problema chi at a essire a campu cando at a acabbare s’epidemia, sa frunidura de màndigu est intamas de apretu mannu. Sos càmion sunt firmos, dae unu chirru e s’àteru de su mare. Cun su càrrigu de mandighare, meighinas e cada genia de materiale. E in s’ìsula ant a abbarrare remonidas sas (pagas) produtziones ativas. Bi sunt àteras maneras de trasportu, est craru, ma ant a bastare a assegurare a sos sardos luego-luego sos benes chi lis bisòngiant?
A cummentare su sèberu de sos commissàrios nde lompet Vincenzo Onorato, su matessi chi at naradu de non pòdere assegurare su servìtziu a pustis sa trassa de sos commissàrios chi issu pensat “in custu mamentu istòricu piessinnadu de su Paisu chi est drammàticu a beru, de irresponsabilidade manna”.
“Sa famìlia Onorato”, si leghet in sa nota “faghet cullegamentos cara e dae sa Sardigna dae belle 130 annos e pro custu e pro òbligu morale amus a torrare a pònnere sos cullegamentos prus pertzisos pro sa Sardigna, su Civitavecchia-Terranoa cun una nave Moby deretu ca Cin non podet fàghere custa faina. M’àuguro, in s’interessu superiore de sas ìsulas chi cullegamus, unu interventu de su guvernu subra sos commissàrios, chi dae issos dipendent, de los torrare in trassa pro acumprire fainas de chie tenet logos de importu”, serrat Onorato.
Su secuestru moet dae sa farta de pagamentu, dae banda de s’armadore, de sas ratas chi depiat pro comporare sa ex cumpannia istatale.
“Sa suspensione de sa continuidade territoriale pro sa Sardigna at a cajonare dannos mannos pro nche bàtire sas merces. Tocat de acumprire fainas luego pro chi non bi siant istrobbos in sos trasportos de bisòngiu, mescamente in su sud de s’ìsula”. Est s’iscràmmiu de su consigeri regionale Nanni Lancioni (Partidu sardu de atziione), “Una sessada chi no s’isbetatiat, mescamente in tempos de emergèntzia che a custu pro neghe de su coronavirus, chi ponet in arriscu sa frunidura de su màndigu pro sas famìlias sardas – sighit Laconi – chi diat cajonare cosas peus siat dae unu ghetu sotziale chi econòmicu, mescamente in sa leada de su cabudelogu”. Unu isprammu de nche istrantzire pro s’esponente de sos bator moros chi giai dae eris aiat cuntatadu s’esecutivu “pro agatare una solutzione chi esseret asseguradu sos servìtzios de trasportu de sas merces pro sa Sardigna – serrat Laconi- e instransire unu isolamentu galu in unu mamentu gosi malu pro sa vida sotziale”.
“Semus in dies malas” – narat su presidente de Coldiretti Sardegna Battista Cualbu – pro custu sa nova de sa firmada de sas cursas de sa Tirrènia nos dolet de prus. Non nos podimus peroe firmare o a firmare su traballu nostru, nde diat essire unu abolotu cun cunsigèntzias sotziales mannas”.
A parre de sas ghias de Coldiretti “castiende a in antis e pensende a sos interessos de sos sòtzios nostros e de totu sa Sardigna – sighit Cualbu – isperemus chi fatzant unu bandu internatzionale pro sas cursas marìtimas ue in fines si potzant avalorare sos produtos de su logu nostru. Pro custu nos auguramus chi luego si torret a su chi fiat semper, e pedimus a su Presidente e a sa Giunta chi in su bandu si pòngiat che vìnculu cussu de sas ecellèntzias sardas in nave. Sas naves sunt unu billete pro nos fàghere connòschere e unu imbìdriu pro totu su patrimòniu nostru agrualimentare chi non si podet cuare”.
