CASTEDDU. Prus ospidales, prus pagos militares. Custu est su chi bolent sos antimilitaristas de A Foras chi ant cunvocadu pro giòbia chi intrat a sa 15 a in antis de su polìgonu de Cabu Frasca. “A unos cantos meses dae sa prima aundada de sa pandemia de Covid-19 sa sanidade sarda est afungada in unu trèmene de disorganizatzione e farta de resursas, poderada petzi dae sa bona voluntade de sos operadores sanitàrios e sas cunsighèntzias malas de sa segunda aundada ue nde pranghent totu sos tzitadinos e sas tzitadinas sardos pro neghe, mescamente, de sa miopia de sas istitutziones polìticas regionales e istatales”, si leghet in unu comunicadu.

“E puru, giai a primos de santugaine totu sas bases militares italianas in Sardigna ant torradu a ospitare sas esercitatziones de isparos belle cada die, cun unu disperdìtziu de milliones e milliones de èuros. A totu custu s’annanghet su sèberu de su guvernu, in sas botzas subra s’impreu de su Recovery Fund, de fuliare 30 miliardos in su setore de sa Defensa. Comente movimentu chi est contra a s’ocupatzione militare de sa Sardigna, A Foras non podet serrare sos ogros a in anis de custa ghelea”.

Acò sas rechestas: “Pedimus chi giai dae como s’apostìvighet sena trantzire una moratòria subra sas esercitatziones militares. Pedimus chi sa Regione e s’Istadu retirent sos finantziamentos pro progetos chi serbint petzi a sos interessos de sas fortzas armadas e a su profitu de sas indùstrias de su setore bèllicu. Pro esempru, pedimus de firmare sos finantziamentos de su progetu SIAT de Teulada, su co-finantziamentu pùblicu de sa piataforma pro sos test de sos motores missilìsticos in su Polìgonu de Chirra e su co-finantziamentu de su progetu Casermas Birdes, chi pertocat – in Sardigna – sas tres casermas de s’Esèrcitu in Casteddu e cussa de Teulada. Pedimus chi su dinare resparmiadu pro more de sos primos duos puntos si torret a gastare afortiende sa sanidade pùblica sarda”.