CASTEDDU. "Sunt belle su 13% de sas 48mìgia coladas, presentes in Sardigna, sas aziendas agrìculas ghiadas dae imprendidores pitzinnos, est a nàrrere de edade inferiore a sos 40 annos. Unu datu prus artu cunforma a sa mèdia natzionale chi si firmat a s’8% e chi tenet su primadu a livellu comunitàriu pro nùmeru de agricultores pitzinnos”. Lu narat Coldiretti Sardegna in sa die de sas premiatziones de sos agricultores pitzinnos annoadores e atentos a su sotziale e a sa sustenibilidade. Coldiretti marcat posca chi “sos pitzinnos sunt de importu pro sa chistione de su produtu: cun issos difatis, su contributu a su valore addòpiat”. E, in Sardigna, “su 20% de sas aziendas under 40 est ghiadu dae imprendidoras fèminas”.

“Custu cunfirmat su bisòngiu e s’importu de favorèssere su càmbiu generatzionale pro pesare unu modellu de imprenditorialidade agrìcula semper prus cumpetitivu”, narat su delegadu de Coldiretti Giovanni Frediano Mura. Chi annanghet:” In prus de su fatore econòmicu cun sos pitzinnos creschent sas percentuales de sas aziendas multifuntzionales, chi trasformant e bèndent a manera direta sos produtos issoro. Gosi comente sunt prus artas sas percentuales de sas aziendas agrìculas atentas a sa sustenibilidade e a su recùperu de sos iscartos de sa traballadura”.

Sas premiatziones Oscar green sunt istadas unu retratu de custa agricultura noa. Sos finalistas ghiant aziendas multifuntzionales chi produent, trasformant e bendent a manera direta sos produtos. Ma sunt finas aziendas sustenìbiles atentas a su respàrmiu de sas resusrsas e ue semper prus a fitianu s’avalorant finas sos refudos de sa traballadura.