CASTEDDU. Sos consigeris regionales Nanni Lancioni (Partito Sardo d’Azione) e Daniele Cocco de su grupu consiliare LeU Sardigna, pedint cun fortza chi si mantèngiat s’impinnu leadu cun sos mèigos ispecialistas ambulatoriales veterinàrios chi traballant in sos Servìtzios Veterinajos de su Dipartimentu de Preventzione de s’Ats, pro parare fronte a sa situatzione dudosa chi tenet sa categoria.
“Oe chi est oe bi sunt istrobbos chi pertocant sa categoria de sos veterinajos mescamente sos ispecialistas chi traballant in Tàtari e Nùgoro – narant sos duos consigeris – chi istant in una cunditzione de traballu precàriu, sende sa parte manna de issos, pustis de ùndighi annos, como chi est como operativos (galu) pro 18 oras a sa chida in totu”.
Lu bient totus s’agiudu de balia chi sa categoria at dadu pro su chi pertocat s’atividade fata e prus a notu sau de aere isortu s’istrobbu de sa peste suina africana e sas emergèntzias chi acuntessent in totu su territòriu regionale”.
Pensamus chi siat de dovere a reconnòschere sa dinnidade professionale de custos traballadores – serrant Lancioni e Cocco – e pro custu pedimus, fina ca b’at s’acordu colletivu natzionale chi disciplinat sas relatas cun sos ispecialistas veterinajos (Acn) in vigèntzia dae su 31 de martzu 2020, chi s’impitent sas oras de atividade giai deliberadas a manera formale in sede aziendale, chi s’inghitzet su censimentu de totu sos incàrrigos sessados dae su 31 de martzu 2020 e si fatzat unu intregu deretu de su monte oras torradu a disponimentu, creschende su nùmeru de oras fatas dae sos veterinajos cunventzionados a 30 oras a sa chida in totu”.
- Traduzione a cura di Micheli Ladu