CASTEDDU. Su sonu de s’allarma s’intendiat dae paritzas chidas. Oe s’imposta: Air Italy, sa biada Alisarda, giai Meridiana, serrat totu. Sos atzionistas, Alisarda e Qatar Airways, in s’assemblea de sos sòtzios ant declaradu chi ant a pònnere in licuidatzione sa cumpagnia. Sa cunsighèntzia chi benit luego, sa prima de una filera longa chi non s’ischit ue at a parare, est sa sessada de sas prenotatziones. Chi cajonat unu pianu istraordinàriu pro 35 mìgia passegeros chi aiant comporadu sos billetes finas a su 25 de freàrgiu. Pro chie depiat biagiare sas dies a pustis, ant postu de torrare su dinare. Peruna seguresa subra su benidore de sos cullegamentos dae s’aeroportu de Terranoa-Costa Smeralda, ue Air Italy asseguraiat sa continuidade, finas sena agiudos.
In arriscu bi sunt belle 1200 postos de traballu (550 in Sardigna) e sos trasportos in aèreu dae e cara a sa Sardigna. In su dossier Air Italy su presidente de sa Regione Christian Solinas, giai in Bruxelles pro parare fronte a s’emergèntzia de sa continuidade territoriale aèrea, at pedidu un’atòbiu luego a su ministru de sos Trasportos Paola De Micheli e a su collega de s’Isvilupu econòmicu Stefano Patuanelli. Su Guvernu est giai in campu. “Non si podet bagiulare su sèberu de licuidare una azienda de cussa mànnària sena mancu nàrrere in antis calicuna cosa a su Guvernu e sena pònnere in contu àteras solutziones”, at naradu Paola De Micheli, ministra de sas Infrastruturas e de sos Trasportos. “Duncas so isbetende chi Air Italy sesset sa deliberatzione finas a s’atòbiu chi podimus pònnere in calendàriu moende giai dae sas oras chi intrant”.
Sunt arribadas luego finas sas reatziones dae banda de su mundu de sa polìtica regionale e de sos rapresentantes de categoria.
Sos rapresentantes de Federalberghi ant naradu chi sa situatzione est “unu isciacu mannu pro totu sa Sardigna” e pedint a sos rapresentantes de sa Regione e de su Guvernu pedende de remplassare Ait Italy cun Alitalia in sos biàgios dae e cara a Terranoa. Su Movimento Cinquestelle mutit a giudìtziu a sos meres de sa cumpannia “chi si depent leare càrrigu de custa acuntèssida disisperada”, si leghet in una nota, “assegurende una sighida in su traballu pro sas professionalidades de livellu artu chi oe las ant postas in sa ruga”. Sa segreteria regionale de su Partito Democratico narat chi est “una derruta dae banda de sa Regione” e pensat chi “serbat chi totu cantos, inghitzende dae sa Regione, sighende cun su Guvernu, traballent pro agatare una solutzione chi potzat amparare sos postos de traballu e totu su sistema de trasportu de sa Sardigna”.
Su parre de su deputadu de Forza Italia Ugo Cappellacci est chi “su de pònnere in licuidatzione Air Italy e s’arriscu de isulamentu pro sa Sardigna si depant leare pro su chi sunt: una emergèntzia natzionale”.
In sas oras imbenientes ant a numenare duos licuidadores chi ant a traballare subra de sas passividades ammuntonadas e chi ant a ammuntonare pro sos dipendentes. Su presidente de Air Italy Roberto Spada in una lìtera a sos traballadores, at comunicadu “a dolu mannu” su sèberu de totus sos atzionistas pro sa licuidatzione. “Pro neghe de sas cunditziones malas de su mercadu chi galu sighiant – si leghet – non si podet prus sighire custa faina”.
E in custu degollu arribat sa nota de Qatar Airways, sòtziu de minoria chi narat: “Nois aiamus chèrfidu torrare a capitalizare, ma custu si podiat fàghere petzi cun s’impinnu de totu sos atzionistas”. Unu degollu aèreu. Sena pampas, pro immoe.
