CASTEDDU. Chimbe milliones de èuros pro sas aziendas sardas de autotrasportu nòghidas dae sa pandemia Covid: arribat su eja dae banda de sa commissione Trasportos de sa Regione.

Su pianu de interventu pertocat pro su prus, belle 1500 aziendas, e si podet assummare cun àteras mesuras comente a cussas “de minimis” e àteras de càbidu temporàneu ammitidas dae sa normativa europea, bastis chi siant acapiadas a sos interventos subra s’abrandada de s’impatu econòmicu negativu de sa pandemia. Sas impresas interessadas, chi trabalant in su trasportu dae e cara a sa Sardigna, ant a dèpere documentare su calu de su faturadu acarèndelu cun cussu – de sua matessi purrata – de su triènniu in antis.

In commissione s’est arresonadu finas de su problema de sa seguresa de s’istrada istatale 130, chi cullegat Casteddu cun s’Iglesiente. In sa relata sua, s’assessore regionale a sos Traballos pùblicos Roberto Frongia at ammentadu sas criticidades mannas de su tretu, chi nde faghent de sa 130 una de sas bias prus perigulosa de s’ìsula, dende peroe sa nova de unu progetu mannu, arribadu a sa fase definitiva, ue b’at s’adeguamentu de sas corsias de marcia, banchinas e spartitràficu, in prus de sa burrada de sos incròcios a rasu e a s’acumprida de una viabilidade cumplanare. Pro su progetu, a incuru de s’Anas, est prevìdidu unu gastu in totu de 199 milliones e s’at a dèpere pònnere a Valutatzione de impatu ambientale. Frongia at annuntziadu chi, pro chircare de ismenguare meda su tempus de sa burocratzia ant propostu sa gestione commissariale de s’òpera.