CASTEDDU. Sas iscolas ant a torrare a abèrrere su 14 de cabidanni, cunforma a sas diretivas de su Guvernu e de su Ministru. Ma in Sardigna comente si podet a torrare a abèrrere in seguresa? Preguntas, ipòtesis e respostas chi s’assessore regionale de s’Istrutzione Pùblica, Andrea Biancareddu at chèrfidu cumpartzire cun organizatziones sindacales e commissàrios istraordinàrios de Sardigna, reunende pro sa prima borta sos istados generales de s’iscola.

Paritzos interventos in unu sentidu de collaboratzione ue totu sas parte ant torradu gràtzias a s’assessore pro sa cumpartzida e sas propostas. Medas sos istrobbos e medas sas rechestaxs bogadas a campu, dae su dimensionamentu a sos precàrios, dae sa dispersione iscolàsticas a sas Autonomias e a sos traposrtos. “Torro gràtzias a totus pro esser bènnidos – at naradu s’assessore Biancareddu – pro àere retzidu sas finalidades de custu atòbiu. No est una batalla de parte ma una batalla de totus. Custa est una partida chi depimus giogare totu paris ca est tostada e peleosa, non serbit a si cuare o a nàrrere chi no est cumpetèntzia nostra. S’istadu non si nde podet sabunare sas manos e afutire lassende nos sena su dinare. Pro s’iscolasa Regione at a fàghere sa parte sua ma s’Istadu non nos podet dare sas Lìnias Ghia a s’ùrtimu e nos lassare sena ischire comente e in ue podimus abèrrere. Su 14 de cabidanni est cras, no intre de un’annu. Non nos narant comente depent èssere sos bancos, si est bastante s’istesiada ipotizada de unu metro e otanta. Cales iscolas tenent sos tretos bastantes e cales nono. Ispero chi s’epidemia sesset e chi lasset abèrrere sas iscolas in manera segura”.

“Finas pro su progetu Tutti a iscol@ semus chirchende de gastare totu pro sas lìnias A, B e C. Non b’at perunu atu chi preìghet o chi fatzat cumprèndere chi sa Regione non chèrgiat andare a in antis. Isbetende sas lìnias Ghia dae banda de su Ministru Azzolina amus torradu a cunvocare pro martis chi intrat a ora de sas 11 un’àteru atopu ue in antis bidos sos problemas, s’at a chircare de agatare una unidade de fainas pro cando ant a torrare a abèrrere sas iscola e pro s’intrada de 200 mìgia discentes sardos.