CASTEDDU. Sa Regione ponet 5 milliones de èuros che a sustennu a sas famìlias in dificultade chi istant in domos de pesone. Sa Giunta regionale at aprovadu sa delìbera pro partzire sas resursas e ammaniare sos critèrios pro isparghinare sos fundos pro sos incuilinos chi sunt in dificultade econòmica manna e chi non resessint a parare fronte a su pagamentu de sa pesone. Sas resursas las ant a intregare a sos Comunes pro sos meses chi moent dae ghennàrgiu a abrile cunforma a sa graduatòria ammaniada a pustis de sa publicatzione de su bandu e sunt sa cuota de co-finantziamentu chi sa Giunta Solinas at postu a disponimentu pro cuntrastare sos efetos de s’emergèntzia acapiada a su Covid-19.

“Amus aprovadu una mesura in prus chi nos permitit de intervènnere pro agiudare totu cussas famìlias sardas chi non podent poderare sos gastos de pesone de sa domo de residèntzia – narat su Presidente Solinas – S’istrobbu de sas domos chi pertocat sa gente chi prus nde pranghet dae sa crisi est a seguru unu de sos degollos sotziales prus isparghinados. A dare una imposta in tempos lestros cun resursas de balia est unu sinnale de atentu cuncretu chi bolet abrandare sos efetos de s’emergèntzia sanitària chi cun cada mezu e traste chi tenimus a disponimentu semus chirchende de firmare”.

Aprovados finas sos critèrios pro sa partzidura de sas resursas. Dae custu ghetu ant buscadu duos lìmites cunforma a s’Indicadore de sa situatzione econòmica equivalente, Isee, de su nùcleu familiare.