CASTEDDU. Record de finantziamentos in sos ùrtimos 4 annos in Sardigna pro sos cantieres de sos benes culturales: 59 milliones de èuros dae su 2016 a su 2019. Pro sos gigantes de Mont’e Prama arribant 2,5 milliones in su 2022. Sos nùmeros lompent dae su bilanciu de su Segretariadu regionale de su Ministeru pro sos benes e sas atividades culturales e pro su turismu chi at presentadu su traballu fatu in sos ùrtimos annos e sos progetos benidores subra su Patrimòniu Culturale de s’ìsula. Su segretariadu regionale at retzidu prus de 38,5 milliones, àteros ufìtzios de su Mibact Sardegna (diretzione regionale museos, subrintendèntzia de Tàtari e Nùgoro e cussa de sa tzitade metropolitana de Casteddu e sas provìntzias de Aristanis e Sud Sardigna) prus de 20 milliones.
At a torrare traballu pro unos cantos 18 milliones de èuros pro belle 70 incàrrigos intre architetos, amministrativos, tècnicos, archeòlogos, intre restauradores e istòricos de s’arte.Intre de sos interventos giai fatos b’at sa crèsia de Santu Pedru de tuili e sas òperas de arte de propriedade de sa crèsia intre Durgale, Benetuti e Bortigale. In s’interis cussas acabdende sunt su museu archeològicu e s’ex ospidale Annuntziata de Tàtari, s’ex museu règiu e su Chiostro de Santu Domìnigu, s’ex tumba de sos pisches e sa pinacoteca natzionale de Casteddu.
Sos gigantes de Mont’e Prama. In su 2022 ant a arribare belle 2,5 milliones de èuros pro s’acontzu de sos repertos, est a nàrrere de totu cussos arrogos chi ant a essire a campu dae sos isfossos chi sunt giai remonidos siat in su Museu Archeològicu de Crabas chi in sa Subrintendèntzia.
“S’at a fàghere s’acontzu de custas isculturas de importu”, at naradu Patricia Olivo, segretària regionale de su Mibact Sardigna, “A pustis su disponimentu de sos finantziamentos b’ant a èssere unos cantos tempos tècnicos e de dovere chi serbint pro pòdere bìere àteras isculturas, su museu de Crabas chi est ismanniende e illarghiende e chi las at a chistire mègius”.
