CASTEDDU. Su comitadu tècnicu consultivu regionale pro sa pisca s’ammàniat a acollire una rapresentàntzia aziendale: cussa de sos piscadores de su coraddu ruju. A lu bòlere est istadu su grupu consiliare Lega chi at giutu in àula sa mudadura de sa lege regionale n.14/1963. “Pro unos cantos custa mudadura at a pòdere pàrrere forsis sena balia”, at naradu Dario Giagoni, cabugrupu de su Carroccio e primu firmatàriu de sa proposta aprovada, “ma sa realidade est chi sos istrobbos chi pertocant custa categoria piessinnada e istòrica de piscadores non los ant mai acaradose resòrvidos comente tocaiat ca fartaiat unu referente in intro de su comitadu”.

“Petzi pro fàghere unos cantos esempros”, at sighidu Giagoni, “dae tempus si cheret fàghere mudaduras a sa durada de su perìodu de pisca, prus astrintu cunforma a su restu de Itàlia, bidu chi durat unu mese in mancu. Si diat pòdere mudare s’ammuntada de sa tassa a s’annu chi si pagat pro s’autorizatzione a sa pisca, chi costat belle su triplu cunforma a àteras realidades italianas. E galu bi diat èsssere su bisòngiu de pònnere unu lìmite de edade a sos operadores. Duncas istrobbos no isòrvidos chi diant megiorare sa faina de sos coradderis, chi tenent una professionalidade reconnota e apretziada in totu su mundu, e chi, nos auguramus, at a ispìnghere a torrare a avalorare sa balia istòria e culturale de sa categoria e s’impèllida de s’oro ruju petziosu de su mare”.