CASTEDDU. Bi sunt unas cantas “vìtimas” seguras in s’iscòrriu intre Abbanoa e Gp Service, sa sotziedade chi gestiat sa cunsinna de sas bulletas de su servìtziu ìdricu in Sardigna. Sunt 200 postinos, dipendentes de sa dita, chi non petzi no ant galu retzidu sos istipèndios dae su mese de ladàmene a cussu de idas: b’at finas sa farta de su rennou de sos cuntratos a tempus determinadu iscadidos in Nadale. Custu ca s’intregada de s’apaltu pro nche giùghere sas faturas nche l’ant revocada. Gosi pro cras dae sas 10 a sas 13 sa Cgil at cunvocadu un’atòbiu de sos traballadores suta sa Prefetura, in pratza Palazzo in Casteddu, chi ant a isbetare su chi at a essire a campu dae s’atopu in s’interis arresonende de custa vertèntzia.

“Una situatzione comomai chi non si podet aguantare, siat pro su benidore de su traballu de sos postinos – at naradu sa segretària regionale Filcams Cgil, Nella Milazzo – siat pro sos istrobbos chi bi sunt pro sa farta de sa cunssinna de sa posta, bidu chi su servìtziu est sessadu de fatu”.

In sas dies coladas sa Filcams, in prus de àere apretadu sa Gp Service a respetare sos cuntratos, aiat marcadu chi sa normativa in vigèntzia previdit sa responsabilidade solidale de su comitente pro sa farta de pagamentos a sos dipendentes de sas ditas apaltadoras. “Dae custu ghetu carchi acrarada est arribada – narat su sindacadu – ca Abbanoa at comunicatu chi bolet pagare deretu sos istipèndios galu a coa”. Pro custu s’atòbiu de cras in Prefetura, ue ant pedidu finas sa presèntzia siat de s’azienda chi at leadu s’apaltu chi cussa chi l’at intregadu, at a èssere de importu mannu: “Non nos nche istichimus in sas relatas intre de comitente e dita de apaltu – at serradu sa segretària regionale Nella Milazzo – ma non podimus bagiulare chi custas peleas las ghetent in costas a sos traballadores”.

Ma cando e comente las ant a cunsinnare sas bulletas arretradas? Dae banda de Abbanoa narant chi non b’at a èssere unu agràviu pro sos impitadores. Sa sotziedade, si leghet in una nota inviada a totu sos sìndigos, “at giai iscontzadu su cuntratu in dannu, a seberare una sotziedade operadora noa chi at a torrare a imprentare sas bulletas non cunsinnadas e at a acumprire sa cunsinna cun Poste Italiane. Su gestore ìdricu at a fàghere “sa cunsinna (o sa recunsinna) de totu sas bulletas a sos clientes. In prus “inghitzende dae custa chida, segundu unu òrdine cronològicu in sos paritzos Comunes, sas faturas non cunsinnadas las ant a giùghere a domicìliu”. Diat èssere che a torrare a sa normalidade”.