CASTEDDU. Su ministru Boccia at postu in arriscu s’ìsula nostra a una situatzione pagu segura, no lassendeadotare a sa Regione unos cantos sistemas ùtiles pro parare fronte a s’isparghinada de su virus, cun s’averiguada de sa negatividade de sos turistas chi lompent in Sardigna”. Est su chi at naradu su consigeri regionale Nanni Lancioni (Psd’Az) subra su report de cada die de casos de coronavirus fatu eris, cun ismanniada in Sardigna. Una crèschida cajonada, a parre de s’esponente de sos batos moros, finas dae sa farta de ativatzione de sas averiguadas in sos iscalos isulanos.: “Su Guvernu, pro resones polìticas, at impunnadu s’ordinàntzia de su presidente Solinas subra su bisòngiu de una certificatzione chi esseret asseguradu sa regularidade  sanitària de sos passegeros in biàgiu in sos aeroportos e in sos portos isulanos. Una faina chi paret ghiada dae unu pensu polìticu cuntràriu”.

Una discriminatzione chi non si podet cumprèndere conforma a àteras Regiones, a parre de Lancioni, “Non si cumpreendet difatis sa diferèntzia de tratamentu cun sa Campània – serrat su sardista – ue su guvernadore De Luca at impostu su test pro su monitoràgiu de sa positividade cun sos tampones. Unu disponimentu fatu finas in sos iscalos de su Làtzio, cun disponimentos chìrdinos a tretu de tutelare su territòriu regionale. Dae inoghe su bisòngiu chi Solinas àrtziet sa boghe pro tutelare sa Sardigna e barigare sas diferèntziatziones sena cabu chèrfidas dae su Guvernu”.