CASTEDDU. A pustis de Conte, Di Battista. Paret chi sos echilìbrios in intro de su Movimento 5 Stelle, e duncas finas de sa majoria de su Guvernu, colent in su de Tàtari. Inoghe s’ant a fàghere, fortzis in cabidanni, sas eletziones supletivas pro unu postu in su Senadu chi est abarradu lìberu a pustid de sa dispedida primidia de sa senadora pentaisteddada Vittoria Bogo Deledda. E si in sas chidas coladas aiant naradu de una candidadura dàbbile de su prèmier Giuseppe Conte, como est arribada sa proposta pro Alessandro Di Battista. Rapresentante de sa parte prus atzuda de sos grillinos, a pustis de una purrata de autoesìliu fatu de biàgios e iscritura, s’ex parlamentare s’est bidu iscusiende sa candidadura pro cussa cadira dae banda de unos cantos deputados e senadores de primore. A ispìnghere pro s’isntrada sua in Palazzo Madama sunt su sardu Ettore Licehri e sa romana Paola Taverna, a su chi contant. Ma Di Battista etotu paret chi apat torradu su nono.

E una eletzione dàbbile diat podet pònnere su problema de su lìmite de su mandadu dòpiu. Chi si podet isfrancare, cunforma a s’interpretatzione de unos cantos, ca s’incapas b’at s’eletzione de Di Battista non diat a acumprire totu sa legisladura. Su nùmene suo diat èssere unu nùmene forte. Ma no est naradu chi diat a bìnchere in sa cuntierra eletorale.