CASTEDDU. In totu sos logos pùblicos si depent apicare sas informatziones subra sas mesuras de preventzione inditadas dae su ministeru de sa Salude. In totu sos ufìtzios e in sos locales abertos a su pùblicu, posca, “si depent pònnere a disponimentu de sos chi bi traballant, in prus de sos impitadores e visitadores, solutziones disinfetantes pro sapunare sas manos”. In prus “sas aziendas de trasportu pùblicu depent fàghere interventos de sanificatzione istraordinàrios de sos bus”. Sos biàgios de istrutzione o semper e cando calesisiat faina foras de s’iscola “sunt trantzidos finas a su 15 de martzu” e sos candidados a unos cantos cuncursos si depent isparghinare a distàntzia de seguresa. Sunt totus disponimentos chi b’ant in s’ordinàntzia noa de su presidente de sa Regione Christian Solinas pro prevènnere unu contàgiu dàbbile de coronavirus in Sardigna (INOGHE SU DOCUMENTU INTREU). 

Su documentu, su de tres chi su guvernadore firmat in pagas dies, tenet finas sos inditos pro su cumportamentu chi si depet tènnere dae banda de cussos chi torrant dae sas chi mutint “zonas rujas” ue ant cunfirmadu su contàgiu e subra su chi serbit s’incapas bi siat contàgiu.

Chie torrat dae sas leadas de maladia lu depet nàrrere a su dutore suo o a su pediatra o a sas istruturas sanitària chi sunt cumpetentes in su territòriu. Tando inghitzat s’isulamentu domiciliare precautzionale de 14 dies, e sas maneras de cumportamentu si inditant a pretzisu a sa persone corpida. S’ant a pustis fàghere sas averiguadas mèigas e sanitàrias chi li pertocant, mentras s’ant a vedare “totus sos cuntatos sotziales”.