CASTEDDU. "Acò sos tres fundos chi amus propònnidu a su Consìgiu regionale dedicados a sos comunes”. Est su presidente de s’Anci Sardegna, Emiliano Deiana, chi faghet ischire in Facebook sas rechestas fatas a sa Giunta e a su Consìgiu arribende chi est sa manovra de acabbu de annu. Tres fundos “dedicados a sos comunes chi sunt peleende cun s’emergèntzia” e “a pitzu de cussu chi nois pensamus siat de importu mannu dae su ghetu sanitàriu, narat Deiana, “chi in una manovra de belle 500 milliones de èuros, pensamus, si potzant buscare sena istrobbos e polèmicas o partziduras”.

 

Su primu pedidu est unu fundu pro sos comunes “pro sanificatziones istraordinàrias de locales pùblicos (ambulatòrios, iscolas, RSA, comunidades de aposentada etc.) pro unu gastu de 1 millione de èuros in su 2020 e de 3 milliones de èuros in su 2021”. Posca b’at cussu “pro s’agiudu a su traciamentu (somministratzione pro mèdiu de istruturas abilitadas de test antigènicos lestros) pro unu gastu de 3 milliones de èuros in su 2020 e de 5 milliones de èuros in su 2021”. E a s’acabbu “unu fundu pro sas fainas econòmicas (tzilleris, ristorantes, atividades cummertziales etc) de sos comunes chi ant decretadu lockdown de su totu dae su 01.10 a su 30.11 pro unu gastu in totu de 3 milliones de èuros in su 2020 e de 5 milliones de èuros in su 2021 in favore de sos comunes chi apant assuntu unu provedimentu de cussa genia a pustis de su 30.11.2020”.