CASTEDDU. Su sardu ebbia chi est lòmpidu a unu incàrrigu a livellu natzionale in s’istòria de sa federatzione est Marco Mainas, 58 annos, agente immobiliare dae 38, est istadu cunfirmadu in sa ghia de sa visupresidèntzia natzionale de sa federatzione italiana mediadores agentes de afàrios.

A pustis de sa cunfirma noa de Santino Taverna in sa ghia de sa Federatzione pro sos chimbe annos 2020-2025, fata in s’Assemblea de su 25 de argiolas coladu, su Consìgiu natzionale Fimaa – Federatzione italiana mediadores agentes de afàrios, chiadèrit a Confcommercio-Imprese per l’Italia – cun proposta de su presidente Taverna at cumpletadu su rennou de sas càrrigas sotziales, cun sa nòmina de sos chimbe visupresidentes natzionales (incluidu su vicàriu) e de sos ùndighi cumponentes de sa Giunta esecutiva.

Comente visupresidente vicàriu ant cunfirmadu torra a Maurizio Pezzetta (Fimaa Roma).

A sa visupresidèntzia ant torradu a cunfirmare a Marco Mainas (Fimaa Sud Sardegna), Alessandro Simonetto (Fimaa Venezia e Rovigo) e nominadu duos visupresidentes noos: Davide Bisi (Fimaa Pavia) e Vincenzo De Falco (Fimaa Campania, cun sos mandamentos de Napoli, Caserta e Salerno).

“Custu incàrrigu mi permitit de tènnere totu s’organizatzione pro totu s’Italia”, at naradu Mainas, “est una delega chi tenia in sos chimbe annos in antis petzi pro su Sud e sas ìsulas, custa borta l’ant ismanniada a totu italia mancari chi pense chi in custu mamentu mi serbat s’agiudu de àteros cullegas chi m’ant a agiudare in sos territòrios issoro, una cosa de importu chi mi permitit de promòvere s’ìsula”.

SOS DATOS. Sa federatzione de sos agentes immobiliares est una de sas prus de importu a livellu natzionale, contat prus de 12 mìgia iscritos cun unu cumpartu chi sortit a 40 mìgia traballadores. Segundu sos datos de sa Càmera de Cummèrtziu, sos agentes ativos sunt belle 450 in su Sud Sardigna. Petzi in Casteddu si nde contant 150 iscritos a sa Fimaa Sud Sardigna.

SU MERCADU IN SARDIGNA. Pandemia e serrada no ant firmadu sas bèndidas e sas còmporas. Sa Fimaa Sud sardigna at congruidu acordos cummertziales cun sotziedades chi ant abertu su mercadu a su Virtual Tour. Su faturadu ismànniat cunforma a sos annos colados de su 5% dae ghennàrgiu a oe. Sos prètzios de sos immòbiles ant caladu de pagu in s’interis de s’annu cun unu -10%. Ma como sos prètzios si sunt firmende. Oe mudant sos bisòngios de chie còmporat. S’emergèntzia sanitària ispinghet chie cheret comporare una domo a avalorare semper de prus sa presèntzia de terratzas, de verandas mannas e giardinos e duncas de immòbiles foras de tzitade.

“In sos ùrtimos meses est capitadu finas chi amus bèndidu domos a persones de su Nord Italia e de su Lazio chi ant chertu torrare a sas biddas nadias in provìntzia de Nùgoro”, at naradu su visupresidente natzionale Marco Mainas, “cun sos virtual tour podimus propònnere sos immòbiles nostros finas barigadu su Tirrenu e agatare respostas bonas”.