CASTEDDU. Trinta cursas in prus pro sos cullegamentos extraurbanos in traballu sa chida chi intrat. L’at sutascritu eris sero s’Arst e Anav, s'Associazione Nazionale Autotrasporto Viaggiatori rappresentada pro sa Sardigna dae su Presidente Matteo Baire.

S’acordu at a cunsentire a s’Arst de afortiare sos servìtzios de trasportu pùblicu locale e, prus a notu, de garantire prus seguresa a sos dischentes pendolares afortiende sos cullegamentos extraurbanos in totu sas leadas de s’ìsula.

Una trintena sa cursas integrativas gai dae sa chida chi intrat, in una chentina individuadas, acumprende a su bisòngiu de istransire cussas situatziones ue b’at subrafollamentu, ‘Semper sapendesi’ narant sas ghias de s’Arst, “chi dae sas averiguadas fatas fatu-fatu finas impitende telecàmeras in intro, su paràmetru de s’80% de càbidura màssima resurtat in sustàntzia respetadu”.

Como cun s’insertada de àteros pullman in sos matessi oràrios de sas cursas prevìdidas, s’Arst punnat a nche leare cale si sisat pensamentu de sos biagiadores, intervenende in sos logos prus frecuentados comente a Iglèsias, su sSulcis, Senorbì, in su Sud Sardigna, in fines in sas provìntzias de Aristanis e Tàtari.

S’ismanniada de  sos mezos e de sas cursas at a èssere prus che totu pro sas iscolas e at a tènnere s’agiudu de sas aziendas privadas assotziadas a s’Anav chi faghent trasportu pùblicu in custa fase dìlica meda de emergèntzia pro sos cuntàgios de Covid-29.

“S’emergèntzia chi semus connoschende ponet in mesu sa responsabilidade de totu nois, chi si depet furriare in atziones cuncretas pro parare fronte a sas situatziones prus crìticas”, narat su Presidente regionale de Anav Matteo Baire. “In custu cuntestu”, congruit “su sistema de trasportu de sos passegeros leat importu piessinnadu pro sas dificultades chi connoschimus e comente Anav regionale semus prontos a sustènnere”.