Limba Sarda

Pisca e agricultura in crisi in Sardigna: “Su guvernu asseguret licuididade"

  ITA      SRD

Pesca-sardegna

CASTEDDU. “B’at bisòngiu urgente de mesuras de coitada e isburocratizatzione pro allestrare totu sos procedimentos amministrativos, assegurende a sas impresas licuididade pro parare fronte a sa crisi”. Sunt unas cantas rechestas chi s’assessora regionale de s’Agricultura, Gabriella Murgia, paris cun sos cullegas de sas àteras Regiones, at fatu a sa ministra de sas Polìticas Agrìculas, Teresa Bellanova, eris in s’interis de una videocunferèntzia.

“A sa ministra – narat s’esponente de sa Giunta Solinas – l’amus frunidu unu documentu cumpartzidu ue si rapresentat su pegioru de sa situatzione in su mundu de s’agricultura e de sa pisca”. Sos assessores ant finas pedidu de trantzire sas iscadèntzias imbenientes chi pertocant su setore vitivinìculu e de s’Ocm de s’ortofrùtora e de su Programma de isvilupu rurale avalorande de manera ositiva sa trantzida a su 15 de làmpadas de sa presentatzione de sas dimandas.

“In custu mamentu – marcat a craru Gabriella Murgia – depimus tutelare sas produtziones locales cun mesuras piessinnadas chi nde favoressant su consumu, finas e mescamente in sa distributzione manna, ca dae s’èsteru est sighende a arribbare una cantidade manna de produtos agrualimentares. In Sardigna sa bèndida est derruta, ponende in arriscu sas fileras prus de importu nostras, comente cussa de s’angione Igp, de sos produtos de istajone, dae sa cartzoga a sa fràgula, e su piscadu de su logu. Finas sa regione – serrat s’assessora – est faghende e at a fàghere sa parte sua pro defensare su mundu produtivu, comintzende dae sas mesuras postas in su pachete ‘Antivirus pro su Sistema Sardigna’. A in antis de custa emergèntzia no amus a lassare solas sas impresas nostras.

 

contributo regione sardegna sito.jpg