CASTEDDU. S’opositzione a sa giunta regionale ghetat ludu subra sa Sardigna pro si fàghere bìere de prus: est su pensu de su deputadu sardu de Fratelli d’Italia Salvatore Deidda a pustis de su ccarràgiu pesau dae s’inchesta de Report subra su sèberu de torrare a abèrrere sas discotecas in Sardigna e su comentzu nou de su contàgiu.

Dae su centrumanca e dae su Movimento 5 Stelle sunt arribadas sas acusas a su centrudereta ghiadu dae Christian Solinas. E Deidda narat: “Tzacamanos a sos progressistas, che a Massimo Zedda, a su senadore Cani de su Pd e a sos 5 Stelle. Sunt resessidos in fines a fàghere chistionare de issoso etotu ma finas de sa Sardigna. Parabenes a sos amighigheddos issoro chi gruspint fele in internet”, inghitzat, “Nos incurpant torra de sa segunda aundada. Emmo. Non si nèghidant cun su Guvernu issoro chi depiat averiguare sos chi torraiant dae Ispànnia, Grecia e mancari s’imbarcaiat cara a Sardigna. Sa neghe est de sas discotecas sardas. Su Virus l’ant pigadu in Sardigna. Non si chèsciant cun su Ministru de s’Internu pro sa farta de compudadas. Bravos. Publicidade garbosa ant fatu. Pro essire a campu issos e bochire s’aversàriu, mirade compende defensant sa Sardigna”.